Ek shaam
ek shaam
almaari par dhoop gir rahi thi
purani kitaabe sunheri chamak rahi thi
maine ek kitaab dhul se uthaai hi thi
ki khushi se tinke naach padhe
aur aas paas ke jaale jhum uthe
sannaate mei panne palat kar
haath kaap gaye
gadde akshar ungliyon se
ateet mei le gaye
kitaab toh halki thi
lekin dil bhaari ho gaya
likhaai mei galti thi
lekin bachpan sachh bol gaya
kuch baatein thi ankhri panno mei bhari
kuch panne the annsuon se saje
kuch lafz the jaldi mei likhe
kuch jhoot the khud se bole
sab kahin safed panno ki beech kho gaya
kaale neeley aksharon ka arth badal gaya
uss taareek ka saal badh gaya
ek pal mei sab maayoos ho gaya
kitaab se ek sookha phool gir gaya
aur samay ek sawaal ban gaya
Jis awaaz ne likha tha
Vo hi badal gayi
Toh maine kitaab wapas rakh di
suraj dhal gaya
aur chamakti kitaabe bejaan ho gayi
bandh almaari mei
vo awaaz kahin kaid ho gayi
safed panno mei vo
puraani baatein maili ho gayi
aur vo kahaani firse kahin dhul mei jam gayi
